النسوان مجانين 3 - مروه و الشك القاتل

علشان تفهم القصه ديه لازم تقراء النسوان مجانين 2 - كيد الرجال
http://www.nilefish.com/2015/10/2.html

يوم واحد بعد جلسه القهوه مع ماجد و هيثم

المنظر: نهار خارجي جو صحو الساعه التاسعه صباحا يوم الجمعه

المتر (انا) يجلس علي مقهي (كافيه) في شارع واسع رئيسي علي تربيزه خارجيه يحتسي القهوه و يقراء جريده في سلام
المتر يشعل سيجاره و ينفخ دخانها في الهواء في استرخاء و هو يشاهد الشارع
التليفون يرن
ينظر المتر الي شاشه الموبايل و يري اسم مروه

المتر (يحدث نفسه): قال يا قاعدين يكفيكم شر الجايين ... نهارنا ابيض علي الصبح
المتر (يردعلي مروه بغلاسه): نعم ... فيه واحده تانيا عاوزاني انزل وراها

مروه: انت لسه زعلان ... حط نفسك مكاني ... كان لازم اتنرفز
المتر: و العاملتيه ده نرفزه؟؟ ده شغل مجانين يا مروه
مروه: انت فين؟ عاوزه اكلمك في موضوع
المتر: خير اللهم اجعله خير ... و لو اني متأكد ان عمر ما بيجي من وراكي خير يا مروه
مروه: انت فين بس؟
المتر: قاعد علي الكافيه بشرب قهوه في سلام ... وطبعا انتهي السلام مع ظهورك يا بركان الاذي
مروه: انا جايالك ما تتحركش
المتر: اتصل بالبوليس دلوقت و لا استني لما تيجي.

مروه اغلقت الخط

المتر (و هو بيحط التليفون علي التربيزه): استر يا رب

مروه وصلت للكافيه ... لابسه مبهدل كانها قاعده في بيتهم و بدون ماكياج و شعرها ملفوف كحكه

المتر (يحدث نفسه): مروه وصلت بيونيفورم المصايب ... ديه ايام سوده

مروه: صباح الخير يا ابو داوود

(ابو داوود ده الاسم الحركي للمتر في وسط الاصدقاء لهدوء اعصابه في تعامله مع المواقف)

ابو داوود: اهو صباح و السلام ... ربنا يستر
مروه: بقا ديه طريقه تقابلني بيها
ابو داوود: المره الجايه هافرشلك الارض رمل و ازغرد لك

مروه: ما علينا ... انا عاندي مشكله و لازم تساعدني و من غير ما هيثم يعرف
ابو داوود: خير ... ما هي مش اول مروه
(مروه كانت احيانا بتطلب من المتر ابو داوود المساعده من ورا هيثم علشان هيثم ما يتخانقش معاها بسبب مصايبها)

مروه: هيثم بيعرف عليا واحده
ابو داوود: مين ديه؟
مروه: يعني انت ما تعرفش صاحبك ماشي مع مين؟
ابو داوود: طيب و حياه الجمعنا من غير ميعاد و ها ينجيني من افعالك ما اعرف اي حاجه عن الموضوع ده.
مروه: انا هاصدقك ... انا عاوزه اعرف بقي هي مين.


ابو داوود: حد قالك اني مخبر او بشتغل في المباحث .... و انا مال امي ... ما تعملي معروف يا مروه و تحلي عن الجابوني بمصايبك ديه

مروه: يعني يرضيك تسيبني في الموقف ده
ابو داوود: ياكش تولعوا انتم الاتنين ... ما تحلوا عني بقا
مروه (وهي بتتشحتف بمسكنه): حرام عليك تخونك العشره ... تسيب اختك في محنتها

ابو داوود: مروه عاوزه تطلقي روحي كلمي فتحي ... انا مش بشتغل قضايا طلاق ما انتي عارفه
مروه: انا مش عاوزه اطلق ... انا عاوزه اعرف هي مين
ابو داوود: و لما تعرفي ... هاتعملي ايه
مروه: و ديني لاطين عيشه اهلها
ابو داوود: و هاتعملي ايه مع هيثم
مروه: هاخلي اكبر حته فيه قد السمسمه

ابو داوود: مش كفايه مصايب بقا ... مش حرام عليكي حتي بتاع الامن ما سلمش من اذاكي
مروه: ماله بتاع الامن بقا

ابو داوود: انت فاكره لو كان ماجد قتل هيثم من كام يوم ... كانوا هيمسكوكي لوحدك ... البلغك يعتبر شريك في الجريمه ... و كنت انت هاتكوني شريكه بالتحريض و هو شريك اصلي لانه بلغك بوصول الست يعني كان عارف نيتك لارتكاب الجريمه

مروه: انت عرفت ازاي ان بتاع الامن هو البلغني

ابو داوود: ولا حاجه انا بعد الحصل نزلت لبتاع الامن لاني شكيت فيه ... قلتله انك عورتي هيثم لاني كنت متأكد انه شافك و انتي نازله جري بتعيطي ... و ان هيثم هيعمل بلاغ شروع في قتل و انه هايكون شريكك لان هو البلغك ... و الدليل هو مكالمه تلفونه ليكي... الراجل هرهر و عيط و باس ايدي و حلف ايمانات المسلمين انه ما كان يعرف انك ناويه تقتليه.

مروه: صدق القال عليك ابو داوود

ابو داوود: قصره ... عاوزه مني ايه؟

مروه: عاوزه اعرف هيثم يعرف مين عليا
ابو داوود: ما هو يا مروه لما تعرفي ... يا اما الموضوع هيبقي علي عينك يا تاجر و هيخرج معاها بموفقتك ... با اما هاتطلبي الطلاق ... فانا بقصر و بقولك كلمي فتحي

مروه: و الله ما هاعمل حاجه من غير مشورتك ... اعرف انت هي مين و عقله و خليه يسيبها و من غير ما تقولي ... فيه اعقل من كده؟
ابو داوود: الصراحه اول مره في حياتك تقولي حاجه فيها شويه عقل ... طيب انت جربتي تعرفي هي مين
مروه: حاولت ... ده انا حتي شوفت علي يوتيوب واحده بتفتح تليفون جوزها و هو نايم ببصمه صباعه ...
ابو داوود:  يا خبر اسود ...و عملت كده

مروه: ايوه و فتحت الفيس بوك ما لقيتش حاجه اكيد عنده تليفون تاني عليه اكونت تاني مخبيه

ابو داوود: طيب ليه ما يكونش انت مفتريه و ظالماه
مروه: لأ .... بيتأخر في الشغل و بيعمل مكالمات مشبوها و مش بيتكلم جنبي ... انا متأكده انه يعرف واحده
ابو داوود: طيب باقولك .... هو فين دلوقت
مروه: مامته تعبت امبارح و بايت عندها ... شويه برد مش حاجه يعني ... بس طبعا راح عندها علشان يكلم الننوسه براحته

ابو داوود: طيب روحي يا مروه ... انا هاكلمه و اشوفه هايعمل ايه ... هاقبله النهارده و اوقعه في الكلام
مروه: بجد
ابو داوود: مالكيش دعوي ... انا هاتصرف

مروه: طيب ... بس كلمني

ابو داوود: حاضر بس امشي دلوقتي و مترديش علي الموبايل علشان هيثم يضطر يكلمك في البيت فا ينزل براحته

مروه: سلام ... مستنيا اخبارك

بعد عشر دقائق ابو داوود بيكلم هيثم في التليفون

ابو داوود: ايوه يابني ... امك عامله ايه دلوقت؟
هيثم: انت اشعرفك بموضوع امي ده
ابو داوود: عيب عليك ... ده انا اعرف العفريت مخبي ابنه فين ... المهم امك عاملا ايه؟
هيثم: يا عم مافيش حاجه هي كويسه ... بس الصراحه كنت عاوز افضي دماغي شويه فاتلككت

ابو داوود: طيب انا علي القهوه ... تعالي
هيثم: خييييير
ابو داوود: تعالي بس عاوزك
هيثم: فيه مصيبه
ابو داوود: لا مش مصيبه ... بس لو ماجتش هاتبقي مصيبه
هيثم: استر يا رب .... انا شامم ريحه مروه
ابو داوود: عليك نووور ... تعالي بقي
هيثم: هي ايام سوده انا عارف ... ربعايه و هاكون عندك
ابو داوود: مستنيك

هيثم وصل

هيثم: خير في ايه
ابو داوود: يا عم قول صباح الخير
هيثم: يا عم صباح الخير ... اخلص بقا فيه ايه
ابو داوود: مراتك بتراقبك
هيثم (متنرفز): انت بتهرج ... جايبني علي ملا وشي علشان تتريق
ابو داوود: و الله ما بهرج ... ديه حتي فتحت الفيسبوك بتاعك
هيثم: يا خبر اسود ... و انت عرفت ازاي
ابو داوود: كانت لسه هنا و بتحكيلي ... ديه شاكه انك تعرف عليها واحده... انت تعرف عليها واحده يله؟
هيثم: و الله يابني لا واحده و لا كلبه بلدي حتي
ابو داوود: طيب انا رأيي ننمي الاحساس ده عندها لحد ما نصدما انها غلطانه و ساعتها هاتشيل الفكره ديه من دماغها خالص
هيثم: انت اتجننت ... ديه هاتبهدل الدنيا
ابو داوود: انت شوفت بقت حمل وديع ازاي لما حصل موضوع ماجد
هيثم: ايوه
ابو داوود: احنا هنستخدم نفس الطريقه بس بشكل مختلف و اقوي ... و انا هامثل دور الجاسوس المتعاطف معاها فكده هانعرف اخبارها و هانحسسها ان ليها مصدر اخبار موثوق فيه ... و ساعتها اي حاجه هاقولها هاتصدقها ... و نحشي مخها باي حاجه بقا احنا عاوزنها
هيثم: صدق الي سماك ابو داوود
ابو داوود: قولي هو ايه حكايه التأخير في الشغل و المكالمات السريه الانت بتعملها ديه؟
هيثم: يا خبر اسود هي عرفت حاجه
ابو داوود: احيه انت مش لسه بتقول انك حمل وديع يا روح امك
هيثم: يا عم انت كمان ... ده عيد جوازنا كمان شهر فا كنت سارق باسبورها و بعملها مفاجئه سفريه لاوروبا
ابو داوود: ما هي هاتعرف ... اوروبا يعني فيزا شنجن ... يعني لازم هي تروح
هيثم: ما هي معاها فيزا ساريا
ابو داوود: حلوووو ... انت بتكلم في شركه السياحه ست ولا راجل؟
هيثم: بنت
ابو داوود: مزه
هيثم: مش قوي
ابو داوود: صوتها حلو و دلوعه
هيثم: موووت
ابو داوود: بس احنا هانخليها تشك ان البنت ديه صاحبتك...و بعدين هانخليها يجيلها تأنيب ضمير خرافي لما تكتشف ان بعد كل الشك فيك ده انك كنت بتعمل حاجه علشانها و ساعتها ها تتبط و تبطل حركات المجانين ديه

هيثم: خطط و انا معاك يا محسن بيه ممتاز يا ملك المخابرات

ابو داوود: انا هاقولك نعمل ايه.