النسوان مجانين 2 - كيد الرجال

علشان تفهم القصه ديه لازم تقراء النسوان مجانين

http://www.nilefish.com/2015/10/blog-post.html

يومين بعد حادثه بيت هيثم.

انا قاعد علي القهوه لقيت هيثم داخل عليا

انا: اهلا بملك المصايب

هيثم: اهلا يا عم القرد

انا: وديت مراتك مستشفي المجانين و لا لسه ... اعتقد الخانكه عندهم قسم نساء

هيثم: يا عم ارحم امي بقا مش ناقصاك

انا: يا هيثم اصلها مش اول مره ... انا مارضتش اتكلم بس قدام ماجد ... فاكر ولا افكرك

هيثم: بس بقا ... مش ظريف علي فكره

انا: احيه ... فاكر موظف الشهر العقاري ... طيب الظابط بتاع كمين الدائري ... و غيره و غيره ... انت يلا لازم تعملها شهاده معاملة اطفال و الا في مره هاتوديك في ستين داهيا

(لان انا محامي فهيثم كان بيكلمني في كل مصيبه بتعملها مروه و هي عملت مصايب تملا موسوعات)

هيثم: عاوز اكلم ماجد يجي بس مكسوف ... ما تكلمه انت ... ديه مراتي كانت عاوزه تكلم مراته تعتذر لها

انا: انت اهطل انت راخر ... هاتكلم مراتو تقولها ايه ؟؟؟ سوري جدا اصلي كنت فاكره جوزي شأطك و لعنت سلسفيل اهلك انت و جوزك و هو عندنا في البيت .... انت محتاج شهاده معامله اطفال انت كمان ... اسمع بيدوا خصم علي الكميات.

هيثم: يا عم ما كفايه تهريج بقا و اتكلم بجد

انا: و هو الانت بتقوله ده جد ... ولا حتي كلام عاقلين ... اتنيل بقا و اقعد ساكت ولا كأن فيه حاجه حصلت ... و اصلا ماجد اخد الموضوع ببساطه ... لو حد غيره كان ضرب مراتك علي فكره.

هيثم: ما هو ده الكاسفني منه اكتر ... كلمه خليه يجي.

انا: لو كلمته انا و قولتله انك معايا مش هايجي ... و لو ماقولتلوش و جه لقاك هايزعل مني ... كلمه انت و انا هاخد منك التليفون اخليه يجي.

هيثم (بيكلم ماجد في التليفون): ايوه يا معلم ... انا و المتر قاعدين علي القهوه ماتيجي .....(ماجد اتكلم) ...(هيثم رد) والله لو ماجتش تبقي لسه زعلان

انا (خطفت التليفون من هيثم): ايوه يا ماجد ... تعالي انا عندي موضوع كده عاوز اخد رأيك فيه.

ماجد: خير فيه ايه

انا: تعالي بس

ماجد: بس مش هانروح لهيثم انا مش ناقص مصايب

انا: لا مش هانمشي من القهوه

ماجد: طيب انا جاي في السكه ... سلام

انا: سلام

انا (بكلم هيثم بعد ما اتأكدت ان الخط قفل): بص بقا... لا تفتح الموضوع ولا كأن فيه حاجه حصلت

هيثم: حاضر ... يعني ماعتذرلوش

انا: يا سيدي ما تتنيلوش

شويه و ماجد وصل

ماجد: يا مساء المصايب

انا: ضحك هيستيري

هيثم: و النبي ما تزعل

ماجد: يا عم ما حصلش حاجه خلاص ... بس انت وديتها مستشفي المجانين و لا لسه

انا: هيستيريا من الضحك

هيثم: معلش اصلها غيوره جدا

انا (لماجد): هاهاهاها ... انا اول ما شوفته سألته نفس السؤال ... و نصحته يطلعلها شهاده معامله اطفال

ماجد: ده اقل واجب

ماجد (لهيثم): ايه الحصل بعد ما سيبناك

هيثم (بيهز راسه شمال و يمين زي البيفقر في حضره مولانا زين العابدين): ديه كانت ليله طين

انا: صحيح ايه الحصل ... ما تحكي يا عم

الويتر: تشربوا حاجه يا بهوات

ماجد: اغلي عصير فريش عندك علي حساب الباشا (بيشاور علي هيثم)

انا: قهوه مظبوط علي روح المرحوم

هيثم: مرحوم مين

انا: انت ... ما هي مراتك هاتقتلك قريب

هيثم: قهوه زياده علي روحي

انا: احكي يا عم الشهيد .... يا شهيد الغرام يا نوغه
(هيثم و مروه كانوا ايام الجامعه في قصه حب مروعه و كلها بلاوي زرقاء عملتها مروه و انا كنت حاضر اغلبها)

هيثم:بعد ما نزلتم حاولت اكلمها 20 مره.... ما ردتش ... بعد كده حاولت اكلم امها لاني عارف انها معاها مردتش برضه ... فضلت وراهم لحد ما امها ردت.

****
هيثم: انتم فين يا طنط .... مروه كويسه
امها: منهاره من العياط ... هو حصل ايه يا حبيبي ... كل الفهمتو انها اتخانقت مع واحد صاحبك
هيثم: واحد بس ... دول اتنين و بهدلت الدنيا ... ما انت عارفاها
امها: هو ايه الحصل
هيثم: بنتك اتخانقت معايا و بتقولي اني ماشي مع مرات واحد صاحبي
امها: يا نهار اسود ... و ديه عمايل ناس محترمه يا هيثم ... ازاي تعمل كده ... ده انت ابن ناس محترمين
هيثم: يا طنط انت كمان ... ما عملتش كده طبعا ... ده خيال بنتك المريض .... المشكله ان التهمتني فيها جوزها كان موجود
امها: و جوزها بيعمل ايه عندك
هيثم: صاحبي يا طنط ....صاحبي و جاي يزورني ... يادي النيله
هيثم: هو صحيح انتم كنتم جايين تعملوا ايه في البيت و هي طلعت لوحدها ليه
امها: معرفش يابني ... جالها تليفون .... اتعفرتت و قالت لي .... انا هاعدي علي البيت دقيقه ... و صلنا قالتلي استني هنا يا ماما و سابتني في العربيه و طلعت ... و نزلت مفتوحه في العياط ... و كل ما اقولها مالك تقولي اتخانقت مع واحد صاحب هيثم
هيثم: ديه فضحتني و تهمت مرات الراجل في شرفها .... بنتك يا طنط كانت بتقوم صاحبي عليا علشان يقتلني
هيثم: المهم انتم فين اصلا
امها: عند داليا صاحبتها و مش عاوزه تكلمك ... بتقول مكسوفه من نفسها و ها نبات هنا
هيثم: طيب ناموا و خليها ترجع البيت الصبح و علي الاقل تكون عقلت
امها: و هو انا بنتي مجنونه يا هيثم
هيثم: لاااا ... ديه ست العاقلين ... تصبحي علي خير يا طنط
امها: تصبح علي خير يا حبيب طنط

******

هيثم: بس و رجعت الصبح البيت و اسفه و انا اتجننت لما لقيتها خارجه من البيت و حجات كده

انا: و كان ايه الرجعها البيت
هيثم: انا عارف ... واحده صاحبتها كانت عاوزه منها فستان و كانت جايا تاخده علشان هايقبلوها
انا: مراتك بتراقبك يا معلم 
هيثم: يا عم ايه الكلام ده
انا: اسمع مني ... مراتك بتراقبك ... و التليفون الجالها ده حد بيبلغها ان واحده طالعالك
هيثم: يا عم لا طبعا ... انت طول عمرك عايش في نظريه المؤامره كده
انا: هاتشوف ... مراتك بتراقبك
ماجد: بتراقبه ... ما بتراقبهوش .... انت مراتك لازملها علاج فورا
انا: هااهاهاا

هيثم (بيبص في الارض): الله يسامحكم

فجأه تليفون هيثم رن 
هيثم: ديه مروه ... الطف بينا يا رب
هيثم (بيرد علي التليفون): ايوه يا حببتي

انا و ماجد بنبص لبعض و نتغامز عليه:  
انا: حابيبتو ...طوالي بقت حبيبته
ماجد: عصفير يا خواتي


هيثم (قام اتنفض واقف): يا خبر اسود ... انا جاي حالا

انا: فيه ايه يابني؟

هيثم: مافيش مافيش ... لو احتاجتك هاكلمك (طلع يجري و سابنا)

ماجد: ما دفعش ثمن العصير المعفن

ماجد: (و هو بيشرب العصير): يا هايقتلها يا هتقتله .... لا محيص

انا: انا نفسي افهم انت ازاي مسكت نفسك و ما لطشتلهاش

ماجد: انت تلميذ

انا: يعني ايه؟ ...مش فاهم

ماجد: انت فاكر ان الكانت جايالي ديه مراتي بجد؟

انا: نعم ... امال مين؟

ماجد: ديه واحده كده اعرفها و كانت جايه تاخد مني محفظتها الوقعت منها في عربيتي

انا: الله يخرب بيتك ... طيب اتنرفزت ليه في الاول؟

ماجد: ما انا في الاول ما فهمتش ايه دخل مراتي ... و هيثم مصاحبها ازاي ... بس لما عرفت القصه هديت و ماكنش ينفع اتكلم و الا هاتبقي ليله سوده ... و خصوصا مع بنت المجنونه ديه ... و حتي لما سابتنا و جريت ما كانش ينفع اتكلم و الا كان هيثم هايسبلي فا سكت ... و انت لما قعدت تهزر انا فطست من الضحك لاني كنت ماسك نفسي بالعافيه اصلا.

انا: يابن المجنونه ... بقا كنت هتودينا كلنا في داهيه علشان واحده صاحبتك جايا تاخد محفظه

ماجد: مش صاحبتي يا عم ...ده انا شأطها من علي النت

انا (مش عاجبني الحصل): انت بتهرج

و فجأه انفجرت من الضحك

ماجد (و هو بيتجعص في قعدته و بينفخ نفسه): جامد انا صح

انا: جدا ... و سبكتها صح الصراحه... لدرجه مروه عاوزه تكلم مراتك تعتزرلها 

(ضحك هيستسري)

ماجد(بيتنفض): يا خبر اسود

انا (مسخسخ): عموما انا اديتها نمره مراتك

ماجد (قام وقف): انت عبيط .... ازاي تعمل كده

انا (و انا بضحك  اكتر لما شوفت خضته): يا اهطل ... و هو انا اعرف نمره مراتك منين يا ضايع

ماجد: طيب هانعمل ايه؟؟ ... لاتكلمها بجد!!!

انا (بصوت شرير): مراتك هاتقتلك ... لا محيص هاهاهاهاهاااااا

ماجد (متنرفز جدا): انت بتهرج

انا: ما تقلقش يا عم انا اقنعته انه مايعملش كده ... بس اعمل حسابك... لو مروه شافت مراتك في اي يوم هاتبقي وقعتكم انتم الاتنين نيله .... و اديك شوفت مروه و عمايلها ... قليل ان ما قتلتكم كلكم و شربت سم.

النسوان مجانين

حادثه غريبه جدا حصلتلي، الصراحه ما قدرتش ماكتبهاش.

المهم، في يوم ما طلعتلوش شمس علي الساعه 7 بليل كده لقيت واحد صاحبي بيتصل بيا

انا: ايوه يا معلم ... خير

هيثم: يا عم مافيش حاجه انا مراتي خارجه النهارده مع امها بعد الشغل متيجي نقعد عندي نتفرج علي فيلم و بيتزا و كده

انا: هو انا صحبتك يا روح امك

هيثم: يا عم ده ماجد هو كمان هيجي و نلعب بلاي ستيشن ماتيجي بقه.

انا: ماشي يا حاج اديني ساعه

هيثم: اهو ماجد وصل تعالي بسرعه

ماجد (من بعيد): انزل بسرعه يا كسلان

انا: حاضر حاضر ... اطلبوا اكل و انا نازل اهو

المهم نزلت و نص ساعه و كنت عند بيت هيثم. ركنت تحت البيت و طلعت في الاسنسير و اول ما فتحت باب الاسنسير في الدور الفيه الشقه سمعت صوت عياط، واحده ست بتعيط و بتزعق.

المهم خرجت و اتجهت ناحيه شقه هيثم لقيت الباب مفتوح و صوت الزعيق جاي من الشقه.

دخلت اشوف فيه ايه.

مروه (مرات هيثم): اهو صاحبك جه.

مروه التفتت ليا و بصتلي: صاحبك حاسب علي نفر واحد بس اجري الحقها قبل ما تروح.

انا (بقول لنفسي): الحق مين و نفر واحد ايه؟؟ هو ايه البيحصل ... هو انا ايه علاقتي اصلا بالخناقه.

ادركت في اللحظه اني دفعت في حرب لا ناقه لي فيها ولا جمل ... ولا اعرف ايه الحكايه اصلا.

مروه (و هي بتزعق و تعيط في نفس الوقت): بتخوني يا واطي ... بتجيب نسوان في البيت ... عاوز تعمل كده يا نجس تعمل كده برا بيتي 

أنا (بقول لهيثم بمنتهي البرأه): هو أنت كنت جايب نسوان؟

هيثم: استني أنت دلوقت اما نشوف الكارثه الهاتعملها المجنونه ديه.

الصراحه ما فهمتش كارثه ايه المروه هاتعملها اذا كنت انت الجايب نسوان ... ثم انا علاقتي ايه ... و قلتلي اجي ليه؟

مروه بدأت تكيل له الشتايم و تلعن سلسفيل ام الجابو هيثم و كل كام شتيمه تلف تقول لي ... "ما تنزل تلحقها" لدرجه اني سألتها في مره ..."الحق مين حضرتك"

في لحظه سوده لقيت ماجد خارج من جوه و بيقفل زرار البنطلون و بيقول: هو فيه ايه يا جدعان هو الواحد ما يعرفش يوستكيف في البيت ده بهدوء.

سادت لحظه هدوء غير محموده و ادركت انها الهدوء الذي يسبق العاصفه و بما ان العاصفه كانت شغاله اساسا فتوقعت كارثه كونيه.

مروه بصتله و وشها بقي لون الكركم و اخدت نفس و راحت راقعه بالصوت "هو لسه في واحده جوه... و كمان جايب صحابك يعملوا كده في بيتي يا وسخ يا واطي" و راحت لفت و وجهتلي الكلام "ماتخش تاخد دورك الظاهر ديه محسبينها علي نفرين"

انا مش فاهم ايه علاقتي انا هي كل ما تتزنق تلفلي انا.

ماجد (بمنتهي البرأه): هو فيه ايه يا معلم.

انا: انت كنت بتعمل ايه جوه؟

ماجد: في الحمام ... هي زعلانه علشان انا طرطرت في حمامهم.

انا: انت كنت لوحدك.

ماجد: يعني هجيب معايا الجيران في الحمام.

طبعا كل ده و في الخلفيه صوت مروه بتسب و تلعن و بعدين سابتنا و دخلت جوه تدور علي النسوان في الشقه و بتقول لهيثم "و ديني لاوديك في داهيه... انا هبلغ البوليس و اوديك السجن"

ماجد: نسوان ايه؟

انا: انتم معاكم حد؟

ماجد: لا

انا: امال هي بتقول قفشت معاكم نسوان ليه؟

ماجد: و ديني الحاجه الوحيده النتايه الطلبناها البيتزا و لسه ما جاتش

انا: بص ... انا بقول نخلع لانها شكلها ليله كوبيا 

ماجد: استنا يمكن يحتاجنا 

انا: الحاجه الوحيده الممكن يحتاجنا فيها دلوقت اننا نشهد على الطلاق ... سيبهم يمكن يعرف يثبتها

ماجد: استني بس لما نشوف ممكن نساعد ازاي

كان لسه في الخلفيه صوت مروه بتسب و و صوت دواليب بتتفتح و دوشه فظيعه.

فجأه هيثم قالها يا مجنونه اسمعي بس... و ساد هدوء لمده 30 ثانيه ... الصراحه الهدوء ده ما طمنيش بالعكس قلقت زياده.

و فجأه هاجت مروه تاني ... كمان مرات صاحبك يا جربوع.

انا و ماجد بصينا لبعض و في نفس واحد "احيييييه"

ماجد: هو هيثم ماشي مع مرات واحد صاحبه 

انا: انا عارف يا اخويا ... بس هي عرفت حاجه زي كده منين ... و ايه الجابها دلوقت بالذات.

ماجد: حظنا الاسود علشان نشوف الليله السوده ديه

ساد هدوء تاني 

ماجد: شكله قتلها

انا: الله يخرب بيتك اسكت اما نشوف ليلتكم السوده ديه.

فجأه مروه هاجت و بقت زي الكلب السعران ... و خرجت لنا و بصت لماجد وقالتله ... "انت بقه ماجد؟" ... هيثم خرج وراها و ييحاول يكتم بقها و هي بتقول لماجد "صاحبك ماشي مع مراتك يا خروف يا دهل"

انا (في سري): احاااا ده الموضوع اخد منعطف زي الخرا ... ديه باين عليها ليله كوبيا.

ماجد بهت و فتح بقه لدرجه اني حسيت ان بقه هيلمس الارض.

هيثم: اخرسي يا مجنونه.

انا للحظه فكرت اجري و اخلع من الموقف ده ... لكني ادركت ان واحد فيهم هايقتل التاني حالا و قررت افضل موجود اهو اجيب الاسعاف للمصاب و اشهد ان الثاني كان في حاله هياج عصبي و ماكنش في وعيه.

ماجد (بيكلم هيثم): انا ايه علاقه مراتي بالبيحصل ده ...ثم انت تعرف مراتي منين اساسا.

هيثم: استني يا ماجد فيه سوء تفاهم

ماجد: سوء تفاهم ايه تعالي هنا فهمني

و بداء ماجد يشد هيثم و انا امسك ماجد و اقله استني يا ماجد الظاهر مروه فاكره ان الماشي معاها هيثم مراتك.

هيثم: انا مش ماشي مع حد

مروه (موجهه كلامها لماجد): اقتله يا خروف يا رمه ده مرمغ شرفك في الوحل ... ديه كانت جاياله و لما عرفت انك عنده نزلت جري.

ماجد بدأ يمسك في هيثم و هيثم بدأ يزعق لمروه و يقولها اخرسي يا مجنونه هاتودينا في داهيه ... و انا ماسك في ماجد و بقوله استني يا ماجد فيه حاجه غلط ... مروه اصلا ما تعرفش مراتك ... ولا تعرفك انت اساسا ... في حاجه غلط يا ماجد.

فجأه هيثم لف و قال لماجد: يابني انت مش مراتك كانت موجوده من 10 دقايق.

ماجد: ايوه و ده ايه علاقته بالموضوع.

هيثم: الهانم افتكرتها واحده انا جايبها و لما بقولها اسكتي عيب ديه مرات ماجد الواقف بره ده عملت الانت شوفته.

هيثم: هي يابني مش كلمتك و كانت جايه تاخد منك فلوس و انت بنفسك الوصفتلها البيت... و كانت نازله جري علشان سايبه للعربيه في وسط الشارع؟

ماجد فتح بقه تاني ... و ساعتها خفت ان الموضوع ينقلب لان ماجد كان ممكن يتهور علي مروه و مش عارف رد فعل هيثم ساعتها ايه.

مروه وشها جاب 100 لون و اتخرست خالص.

مروه: انا اسفه انا اسفه ( قالتها حوالي 20 مره وهي بترجع بضهرها ناحيه باب الشقه) و فجأه لفت و جريت نازله السلم علي رجليها.

انا رحت قعدت علي كرسي علي جنب و ماجد و هيثم كل واحد فيهم قعد في مكان و محدش بيبص لحد.

هدوء فظيع حوالي ربع ساعه.

انا: يخرب بيتك يا هيثم انت مراتك مجنونه ديه كانت هتودينا في داهيه ... انت لازم تنيمها في قفص حديد.

هيثم: اخرس مش ناقصاك

انا: بزمتك يا ماجد مش ديه وليه خطر علي الامن العام 

ماجد: اسكت بقه مش عاوزين قرف الجو متكهرب و انت بتهزر.

انا: ما هو لازم تعترفوا ان الحصل ده كان هايودينا في داهيا و الحمد لله ان الموضوع خلص علي خير.

انا: احمدوا ربنا انها ما دخلتش لقيتك خارج من جوه بتقفل بنطلونك كانت تهمتكم في بعض و كانت هاتبقي وقعتكم سوده ... انا شخصيا ماكنتش هاقدر ادافع عنكم ... تقول عليا بتاع نسوان ماشي ... انما كده ... لا و الف لا.

رن جرس الباب.

انا: و ديني ما فاتح ... حد منكم يقوم

هيثم قام يفتح ...."تو ما جيت يابن المرزوعه ... ما كنت تيجي من شويه تاخدلك من الحب جانب"

قمت انا و ماجد نشوف مين لقينا بتاع البيتزا

لفيت لماجد و قولتله "اهي الحاجه الوحيده النتايه في الليله ديه وصلت" 

ماجد: انا بقول كل واحد ياخد حته بيتزا في ايده و يروح ... و انت شوف مراتك فين لان اعتقد انها هاتكون انتحرت.

انا: بس ما تقاطعش و قول يا رب.

هيثم: الله يخرب بيت ابوها فضحتني

انا انفجرت من الضحك 

ضحك حتي الثماله

الجزء الثاني
http://www.nilefish.com/2015/10/2.html