عادة اكتب بنفسي و لكن هذه المره انشر ما كتبه احد اصدقائي الذين اعتز جدا بصداقتهم
يا ترى العيب فيه ولا فينا ؟؟؟
جروبات كتيرة و عجيبة على الفيس بتساعد بطريق مباشر و غير مباشر في خلق حالة استنفار طائفي و عمل فجوة طائفية داخلية غير مرئية و غير واضحة داخل أصحاب النفوس المريضة ثم تتسع و تنمو تلك الفجوة الى ان تصبح هوة عميقة يسقط فيها الشعب و هي ( الفتنة الطائفية ) و على سبيل المثال لا الحصر طبعا لأني معرفش عدد الجروبات دي قد ايه و لأني كمان مش مشترك في ولا واحد منهم و الحمد لله : ( جيش الله على الفيس بوك - الجيش المسيحي على الفيس بوك ، المجاهد في سبيل الله - المجاهد في سبيل الدفاع عن المسيحية الخ الخ الخ ) الجروبات دي و أمثالها ايه الهدف منها تعميق الإيمان داخل القلوب ؟؟؟ معتقدش لان الإيمان ينمو بالصلاة و التعبد و ليس بكره الاخر و شتمه و سبه و إبراز ما فيه من مساوئ !!!!! مين المسؤل عن تلك الجروبات و ما تحويه من موضوعات و افتاءات ؟؟؟ علماء دين و دعوة أم متطرفين و مرضى نفسيين !!!!! مين المشاركين في الجروبات دي و ايه الأفكار اللي بيستمدوها و بيعرضوها على صفحات الجروبات دي ؟؟؟ ناس مغيبه جهال بدينهم و بباقي الأديان و يستقون سم و يبثون سما أقوى !!!!! يا إخواننا الفيسبوك اسمه موقع تواصل اجتماعي يعني تقابل عليه أصحابك اللي انت مش قادر تقابلهم في الواقع او مش قادر تعثر على تليفوناتهم علشان تسأل عنهم ...... سامحني يا فيسبوك حقك عليا العيب مش عليك العيب علينا إحنا و على امخاخنا التعبانة المريضة اللي محشية بارود على ظلط !!!!! العيب على كل واحد ينزع دينه من قلبه و يزرع بداله دين جديد علينا اسمه التطرف و التعصب الأعمى !!!!! يا ريت نفوق قبل ما نقع كلنا في الهوة المليانة نار و اللي هاتحرق الجميع و لن ترحم احد :( !!!!!
مواطن عارف أصول دينه كويس
جورج محمد تكلا
القاهرة
٢٠١٣/٢/١٢
No comments:
Post a Comment